Ieu kaca geus divalidasi
150
- Ngangres manah kangjeng gusti, nalangsa ningal garwana, Sumawona ka rayat kabeh, anjeuna ge kalaparan, najan terah kusumah, dipaksa lain kumaksud, nyuuh kumambang cisoca.
Pupuh Kumambang
- Prabu anom di kajuaran teh nangis, barina sasambat, duh Allah nu maha suci, nu sipat bapa aherat.
- Muga-muga gusti maparin rohim, rohman ka manusa , rahmat agung rahmat alit, kakiatan nu sampurna.
- Rayat abdi ayeuna seueur nu mati, maot kalaparan sanagara keur prihatin, nyuhunkeun hibar jeng rama.
- Ingsaalah mun kaya kei mah diri, umur abdi candak, teu guna jeneng narpati, ari rayat sangsara mah.
- Aduh ama naha atuh rusuh teuing, ayeuna kumaha, na bikeun bae, nagri ka sang raja Lokagiwa.
- Jero nagri ayeuna parantos jempling, jalmi teu ka aluar, taya jalma nu pelesir, kantun kulit sareng tulang .
- Rayat-rayat awewe sareng lalaki, diburuan moyan, lumayan ngarala teki, beuti jukut dihakanan .
- Daun kai sadayana rugul galaring, seep didalahar, ku jalmi taya nu kari, sumawon bangsa papagan.
- Ta ya pisan jalmi nu jagjag sahiji, kunyinyi sadaya, kuru aking ngajangjawing, kulit hawuk iga ragas.
- Budak leutik balatak dina kamalir, ngan eukeur ngambekan, ngarenghap loba nu mati, layon tara nu ngaruang.
