Ieu kaca geus divalidasi
57
- Raden di dinya tapakur, handapeun kiara calík, iuh sarta tumaninah, angin leulik ngadalingding,tunda anu keur tatapa, kacatur setan keur ulin.
- Ngalayang di mega mundung, pelesir tengah wiati, salaki jeung awewena, salakina pok ngalabir, jikan kami ku hareudang, jeung paranas daun ceuli.
- Hayu anggur buru-buru, ayeuna mah urang balik, tuluy turun duanana, geus daratang kana kai, barang ret nenjo ka handap, duh paingan itu nini.
- Tuh jelema eukeur diuk, mun teu nyaho maneh nini, ku aki nu diheureuyan, ditenung keur jabang bayi, anakna Ringaja Cempala, geuwat nini deudeuh leuing.
- Nu matak ka dieu cunduk, meureun menta rupa asli, nam nini ka ditu hawa, ku cai panyipuh mandi, geus lila teuing karunya, gugu bae nini indit.
- Raden ku nini ditungtun, dibawa mandi ka cai, ari tuluy disiraman, burinyay cahyana bijil, nya cadas-cadas harerang, keusik-keusik bararentik.
- Salira mulus ngagebur, lir emas anyar disangling, kasep lain kaulinan, estu mustika lalaki, dewata turun ka dunya, alit lenggik ngajalentir.
- Geus tutug mandi diruru, ku nini dibawa balik, dibikeun ka salakina, barang ret Raden ningali, gila ningal rupa setan, bulu gimbal biwir jeding.
- Setan ngomong anak bedul, ambu-ambu kasep teuing, matak guyur nu ningalan, matak gujrud eusi puri, hanteu siga memeh datang, kulit hideung mani lucir.
- Bapa pangling nenjo Agus, panyana hanteu rasapati, ayeuna mah meureun punah, moal aya nu nagih, anu ditenung ku bapa, hutang punah ulah nagih.
- Buruhna tah ieu cupu, jimat mujijat linuwih, gede pisan hasiatna, sanajan sapuluh nagri, diasupkeun kana jimat, eta tangtu moal beurin.
