Tuan Yasper nyaur deui, rasa urang moal salah, sabab rupa bapa maneh, beungeutna meh henteu beda, jeung rupa maneh pisan, malah maneh boga dulur, di Banten anu sabapa.
Salim teu ngawalon cicing, tungkul kawas nu mikiran, reh meunang carita aneh, lamun enya henteu salah, tuan tatamu tea, urut ramana kapungkur, dunungan anu bumela.
Meureun moal salah deui, bener caritaanana, ramana waktu bareto, memeh kawin ka ibuna, kagungan deui garwa, tangtu bener boga dulur, nu ceuk tuan geus neangan.
Salim henteu weleh mikir, rusras rea kabaluas, ingetanana teh juljol, ras ka ibu ras ka rama, ka adina Salamah, ka Tarlan deui nya kitu, ingetna teu pegat-pegat.
Aya pikir rek ngilari, mapay dulur ka Pandeglang, sugan pareng bisa amprok, tapi rek nyidikkeun heula, sugan manggih raratan, lamun enya enggeus puguh, maksudna erek dipapay.
Kacaturkeun lami-lami sanggeus Salim kauninga, yen jalma turunan hade, ka sinyoh Dolf bumela, tuan leuwih asihna, sinyoh Dolf pon nya kitu, heman kawas ka dulurna.
Geus teu asa-asa deui, beurang-peuting rerentetan, malah reujeung sinyoh-sinyoh, sobat Dolf di sakola, diwawuhkeun sadaya, lamun pelesir lumaku, Jang Salim teu ara tinggal.
Dibabawa sarta ginding, dihaja sok didangdanan, pakeanana perlente, niron barudak sakola, dibendo make kebat, Jang Salim teu meunang embung, ku nyonya-tuan dipaksa.
Upama eukeur pelesir, sarta campur reureujeungan, jeung Walanda sinyoh-sinyoh, anu ningal pada nyangka, anak terahing menak, murid sakola nu luhur, sakola doktor amtenar.
Ngan hanjakalna saeutik, can bisa ngomong Walanda, ngan sakecap-kecap bae, Jang Salim eukeur diajar, sinyoh Dolf guruna, unggal peuting sok ngadeluk, diajar nulis jeung maca.
Diajarna leuwih tigin, mun senang ti pagawean, sanajan eukeur di kebon, pangajaran tara tinggal, dibawa dipesakan, Nederlandsch woordenboek, ngabereyot 'na pesakna.
