Dasar budak nu berbudi, hade tata reujeung basa, najan ku tuan dienod, ku nyonya dipikaheman, saperti ka anakna, teu boga pikir adigung, ngawulana tambah rosa.
Teu leungit tali paranti, gawe kasar tara tinggal, kukumbah nyapu beberes, najan ku nyonya dicaram, tapi sok keukeuh maksa, jeung batur sagawe rukun, teu gumeden kumagungan.
Tuan-Nyonya geus badami, yen Salim bakal diangkat, sina digawe di kantor, ngamagang kana teekenaar, ngan ku Dolf dicegah, reh Dolf kari sataun, kaluar ti sakolana.
Pikir Dolf taya deui, sakaluar ti sakola, rek menta gawe di B.B., Jang Salim bakal dibawa, nu purah ngabaturan, maksud Dolf erek nulung, mun Dolf geus jadi pangkat.
Kana aspiran kontolir, Salim rek dijieun magang, dibenum di mana bae, sakalian rek diajar, dipalar ka hareupna, malar Salim meunang untung, lulus samen klein ambtenaar.
Lantaran Jang Salim rajin, diajar basa Walanda, kawuwuh campur jeung sinyoh, ngomongna sapopoena, terus basa Walanda, nyonya-tuan ge nya kitu, dipalar tereh bisana.
Tina kitu Ujang Salim, ngomongna geus rada bisa, kaitung geus lancar oge, ku lantaran digetolan, diajarna teu elat, beurang-peuting ngundang buku, ka mana-mana teu tinggal.
Beuki lila beuki ngarti, ngomongna beuki capetang, basana nya kitu keneh, sinyoh Dolf leukeun pisan, ngajarna teu satengah, lila-lila mah teu wudu, geus bisa nyieun karangan.
KINANTI.
Kacaturkeun hiji waktu, Salim tara ti sasari, saberesna tas diajar, nyileuk teu sare sapeuting, eling inget ka ibuna, lantaran lami teh teuing.
Acan ngabaran ka ibu, enggeus meh sataun leuwih, isuk-isuk barang hudang, Ujang Salim gusak-gasik, muka duit sisimpenan, meunang kukumpul geus lami.
