teu jongjon balas ngalamun, ngawawaas ibuna, jeung Salamah nu di bumi, mana teuing mun kiriman geus katampa.
Pibungaheunna ibuna, reh tina sakitu lami, kakara pisan nyuratan, kawuwuh jeung barang kirim, anu aya pangaji, Salim hayang buru-buru, geura meunang walonan, nunggu-nunggu beurang-peuting, kacaturkeun geus nepi kana waktuna.
Kudu narima walonan, tapi amleng acan nampi, Salim teu weleh mikiran, pangelat teu meunang warti, melang teu ngeunah cicing, geus satengah bulan suwung, acan narima kabar, niatna disusul deui, rek nyuratan ditanyakeun ka Mas Lurah.
Ujang Salim geus sadia, meuli kartupos sahiji, barang rek tret nulis surat, katingal anu ngadigdig, pasuratan ngajingjing, surat-surat dina kimpul, nuju ka bumi tuan, Jang Salim bungah teh teuing, moal gagal nampa surat ti ibuna.
Salim gugup samar polah, gancang muru gusak-gasik, pasuratan anu datang, surat-surat geus ditampi, dines jeung partikulir, surat kabar jadi baku, unggal poe keur tuan, ku Ujang Salim dipilih, ari breh teh surat sapotong panggilan.
Ti poskantor Mataraman, surat panggilan wawarti, pospakket adres Patimah, nu di desa Sukasari, ungelna dina tulis, taya adres nu dikintun, ka apsenderna mulang, jadi paket balik deui, Ujang Salim kaget geuneuk jeung ray pias.
Ngajanteng bari mikiran, teu lila jol nyonya sumping, ka Ujang Salim mariksa, walonan ti Sukasari, Salim ngajawab ririh, ngomongna nu semu bingung, abdi heran kacida, ieu paket wangsul deui, sarta bari ngasongkeun surat panggilan.
Ku nyonya ditingalian, bari jeung alon ngalahir, naha ku naon sababna, indung maneh teu kapanggih, boa mah Alim nulis, kurang terang henteu cukup, piraku Salim jawab, terangna kaliwat saking, malah nganggo per adres Lurah Pareman.
DANGDANGGULA.
Sajeroning nyarita Jang Salim, tugteg reuwas henteu puguh rasa, sumeredet hate lungse, nguyung bawaning bingung, ka ibuna rusras
