Anu leuwih perelu jeung wajib, pagawean dines kudu gancang, atawa bisina poho, reujeung jaba ti kitu, ma'lum cekel gawe pulisi, sok rea pagawean, puguh oge kitu, urang osok gancang ngupat, kasalahan batur teu dipikir deui, kaburu ku amarah.
Sabab kitu poma sabar Alim, tunggu heula sawatara lila, antara sapuluh poe, lamun weleh teu jebul, leuwih hade Alim pribadi, nyelang sakeudeung mulang, malar sidik puguh, Salim nguping saur nyonya, rada bungah memang mah keur waktu tadi, geus hayang geura mangkat.
Kacaturkeun bae lami-lami, sanggeus ambleng sapuluh poena, teu aya surat pangwalon, nyonya tuan ngajurung, Ujang Salim dititah indit, meneran poe Ahad, Salim bungah langkung, piisukeun baris mangkat, geus beberes babawaeun pikeun indit, pakean sacukupna.
Saur nyonya Alim wanti-wanti, ulah lila kudu gancang mulang, lamun di ditu geus beres, sukur mun masih hirup, indung maneh bawa sakali, sumawonna Salamah, urang hayang tepung, mun kapareng enggeus ajal, ulah nunggu rek hajat di Sukasari, di dieu ari datang.
KINANTI.
Jang Salim mangga ngawangsul, tangtos abdi moal lami, mun pun biang nyampak aya, tangtos dibantun ku abdi, opat dinten panglamina, di ditu di Sukasari.
Tuan ka nyonyana nyaur, Salim bere deui duit, keur ongkos-ongkos manehna, pikeun karcis bulak-balik, reujeung keur ongkos indungna, adina nya kitu deui.
Sok maparin lima puluh, ku Ujang Salim ditampi, kacatur dina peutingna, Salim teu sare sapeuting, sanggeusna beres diajar, hantem bae gulang-guling.
Ngawawaas nu di lembur, ka ibu teu weleh eling, lamun nyampak henteu aya, diri aing kuma' teuing, inget deui ka adina, di saha ayana cicing.
