Ngaliwat imah paraji, sobat ibuna Patimah, indung-beurang eukeur nagog, di buruan jeung incuna, Salim ngarandeg ningal, Nini! Nini! celuk-celuk nini paraji ngorejat.
Melong ningal ka Jang Salim, tapi jongjon henteu ingkah, nu aya ngan bati kaget, satengahna asa-asa, dipindo dicalukan, Ujang Salim bari imut, kapan kuring Salim tea.
Naha Nini poho deui, nini paraji ngarenjag, indit cengkat jeung ngarontok, ceurik bari ngarangkulan, sasambat Ujang-ujang, teu nyana satungtung rambut, aya keneh di kieuna.
Aduh henteu nyana teuing, panyana Ujang geus ajal, ya Allah deudeuh nu kasep, henteu nyana erek datang, bari jeung diusapan, hanjakal ku tuang ibu, teu bisa patepang heula.
Ujang Salim barang nguping, omong paraji hanjakal, jeung ibuna teu pasondong, sepa pias tina reuwas, nyangka ibuna wapat, ceurik cipanon nyurucud, nyuuh ka sela sepeldah.
Ngangres ngenes langkung sedih, bari nyekel saputangan, pake nyusutan cipanon, nanya bari dumareuda, naha ibu ka mana, paraji alon ngawangsul, kapan geus angkat ka Mekah.
Gebeg deui jero ati, panyangka Jang Salim salah ceuk paraji ka Mekah teh, dikirana enggeus ajal, ka tanah nu sampurna, Jang Salim meh ngarumpuyuk, paraji welaseun pisan.
Sarta tuluy ngomong deui, Asep poma ulah melang, atawa reuwas jeung kaget, kapan ibu carogean, ka Mas Lurah pareman, kawin antara saminggu ti saenggeus Ujang mangkat.
Lamina geus tilu sasih, angkat jiarah ka Mekah, ayeuna mah hayu Asep, angkat ka bumi Mas Lurah, bumi tuang ibu mah, kapungkur ge prantos suwung, diruag geus dikebonan.
Hayu bae gasik-gasik, dianteur bareng jeung ema, tuluy Salim mangkat bae, nuju bumina Mas Lurah, atina rada janglar, saenggeus ngadenge puguh, yen ibuna carogean.
Wantu waktuna geus burit, Jang Salim sajero leumpang, teu jongjon balas titajong, mikir eling ka ibuna, ngenes ngangres baluas, teu eureun ceurik sumegruk, nanya bari dumareuda.
