Nembongkeun hayang ditaksir, ku semah nu anyar datang, jero imah cekcok ewor, ma'lum adat urang desa, rupa-rupa polahna, aya anu teu dibaju, nu ngabeledeh beuteungna.
Awewena kitu deui, kabayana ngaraliglag, rarayud susuna laer, bararudak ditaranjang, bari gegelehean, ear carekcok pahibut, rupa-rupa polah budak.
SINOM.
Susuguhna geus ngalayah, brongbrang rame sora piring, kurupuk kiripik opak, beuleun sampeu bubuy hui, kupat leupeut jeung wajit, cara cucur cai cau, gula meunang ngurudan, cacangkir beres ngabaris, patulayah ngalayah di tengah imah.
Gorgar bari barang dahar, nanggap lalakon Jang Salim, nyatur lalampahanana, ti awal nepi ka akhir, dicaritakeun titi, susah-bungah teu kalarung, sakur anu di dinya, ngadengekeun leuwih titi, lebah suka kabeh pada milu bungah.
Lebah nyarita sangsara, taya hiji anu seuri, nalangsa marilu lara, Jang Salim nyatur ngabuih, ngobrol nepi ka peuting, pukul satu karek suwung, nu nganjang geus marulang, Salim ka kamer geus indit, dipernahkeun di kamer tempat ibuna.
Barang blus asup ka kamar, ngagebeg kaget ningali torombol pakeanana, deukeut tempat tidur nyanding, Salim ngadaweung mikir, gancang torombol diburu, jeung pareng kabeneran, ditutup henteu dikunci, gura-giru ku Salim tuluy dibuka.
Ari breh pakeanana, baju iket katut samping, beresih meunang nyeuseuhan, dientep diatur rapih, ditumpangan wawangi, rampe minyak arum-arum, Ujang Salim teu tahan, baluas ngarasa sedih, rusras waas inget kana lalakonna.
Cipanon ngucur rambisak, rusras ka ibuna eling, sumawonna ka adina, jeung ngomong jeroning ati, ieu torombol aing, nu nyandak tinangtu ibu, waktu ka Mester tea, ngalongok nyidikkeun aing, moal salah reh aing disangka ajal.
Embi Umi nu nyarita, ibu angkat ka Batawi, tuluy toromol
