Sabalikna kuma' ujang, di dieu salamet diri, sanget ibu menta beja, walonan dianti-anti, sakieu ibu nulis, ibu neda ka yang Agung, henteu aya eureunna, muga salamet nya diri, dunga ibu nu kangen Siti Patimah.
DANGDANGGULA.
Salilana Salim maca tulis, jro hatena kagagas baluas, ci panon teu eureun ngocor, suratna munggah cipruk, ngangres ngenes rasaning ati, rupi ibu kacipta asa gok patepung, kawuwuh eusina surat, matak nyeuit ngait galih nu miasih, waas matak baluas.
Salim inget keur di rumah sakit, wireh eusi surat nu dibaca, ungelna dina carios, ku ibu dipicatur, dua bulan teu meunang warti, sedeng diwaktu eta, Salim keur ngaringkuk, di rumah sakit tatamba, pantes surat ku aing henteu katampi, Cep Tarlan nu narima.
Dengek hayam kongkrongok sakali, ujang Salim acan sasarean, najan urut cape lungse, henteu ngarasa tunduh, reh kagoda rea kaeling, nu aya rasa panas, bayeungyang jeung lanjung, tuluy tina korsi cengkat, erek sare kana tempat tidur indit, sabukna geus dibuka.
Barang indit kana deukeut kelir, rek nyangsangkeun sabuk 'na kastokna, Salim kaget ningal potret, dina kastok ngagantung, ku Jang Salim dicokot deui, dibawa ka nu caang, ngadeukeutan lampu, lampu nu geus leutik pisan, diputerkeun caang digedekeun deui, ari breh Salim ningal.
Potret beres ngajajar ngabaris, nu digambar jelema tujuhan, Jang Salim kalangkung kaget, ningal istri ngalingkung, dina korsi calik ngabaris, ibuna jeung Salamah, dupi nu katilu, istri paman Encep Tarlan, nu di tukang opatan ngadeg ngabaris, pameget gararandang.
Tengah-tengah duaan garinding, paman Encep Tarlan jeung Mas Lurah, di sisina nu karasep, masang kenca-katuhu, Encep Tarlan jeung Den Wiryadi, Jang Salim kaget nyeblak, sakalangkung ewuh,
