'na dimana dipotretna, teu kaharti aya lalaki ngabanding, nu panggih di Karawang.
Ujang Salim ngahuleng jeung mikir, tungkul bari melong potret tea, sarta jeung ngagisik panon, malar ulah kaliru, bisi samar salah ningali, dumeh eukeur kacipta, nu pake kaemut, tapi sidik henteu salah, Ujang Salim sampe dua tilu kali, ngagisikan panonna.
Lajeng potret ku Salim dibalik, rek ditingal sugan ditulisan, tanggal bulanna dipotret, ku Salim geus kamaphun, ningal tanggal bulan Batawi, naksir basa ibuna, ka Batawi nyusul, digambarna babarengan, waktu Salim keur matuh di rumah sakit, Jang Salim deui ningal.
Di tukangna tulisan ngabaris, redes beres pada dinomeren, jenengan anu dipotret, hiji nepi ka tujuh, ka tujuhna nami Wiryadi, Jang Salim nembe terang, ngaran nu kapungkur, anu tepang di Karawang, bari melong leng deui ngahuleng cicing, mikir naon sababna.
Anu matak aya Den Wiryadi, ku Jang Salim gancangna kamanah, naksir dina jero hate, lamun kitu geus tangtu, jeung Cep Tarlan enggeus ngahiji, digawe babarengan, Salim muji sukur, ngan anu jadi hanjakal, digawena di mana henteu ditulis, jadi Salim teu terang.
Sanggeus seubeuh dibulak-dibalik, ningal potret dipelong ditingal, Salim tuluy ngagelehe, ngedeng di tempat tidur, henteu tinggal potret dicangking, ka enggon dibabawa, sono acan tutug, ka ibuna jeung Salamah, bari ngedeng nangkarak bengkang ngabanding, ngagoler 'na dadana.
Pukul tilu Salim masih nyaring, cuscos rabeng pipikiranana, peureum beunta henteu sare, teu kaur balas turun, bulak-balik ningalan deui, potret nu dibabawa, kira wanci subuh, Salim nembe sasarean, nu kaimpi kumpul riung jadi hiji, saeusi potret tea.
Mun ditulis atina Jang Salim, peuting eta pipikiranana, anu cuscos ngaler-ngulon, sapeuting nu dilamun, najaan kertas sakoras leuwih, moal cukup diserat, catur bae isuk, jam salapan karek hudang, digeuingkeun ku pribumi Nyimas Umi, wireh aya Mas Lurah.
