Isuk-isuk pukul tujuh, meunang dangdan tuluy indit, nyekar ka kubur ramana, tiluan pairing iring, Mas Saca reujeung istrina, ka Wanasirna geus nepi.
Kuburan pada ngalingkung, tingkaruwes pada muji, maca kulhu jeung patihah, reujeung sajabana deui, sadaya pada hadiah, Salim ngadungana tigin.
Neneda ka Maha Agung, maca kulhu bulak-balik, ngahadiahan ramana, malar meunang rahmat leuwih, atina sajero nyekar, nalangsa baluas sedih.
Cipanonna nyalalangkrung, kacipta di jero ati, rupa ramana nu wapat, tungtungna rea kaeling, inget ka lampah ka tukang, waktu kumpul jadi hiji.
Waktu ngariung mungpulung, tara anggang beurang-peuting, tungtungna tambah kasuat, eling ka ibu nu tebih, cipanon henteu karasa, Jang Salim ngareguk ceurik.
Saputangan munggah cipruk, ku cipanon anu bijil, sanggeus tutas pangdungana, ti makam tuluy arindit, kuncen geus disalawatan, nyekarna enggeus salesih.
Salim henteu balik terus, reujeung Mas Saca ka bumi, sabab isukna rek mulang, perelu samemeh balik, nepungan heula tatangga, ka sepuh-sepuh rek pamit.
Salim nguriling di lembur, mapay imah hiji-hiji, nu wawuh mah didatangan, sakeudeung-keudeung teu lami, ka unggal jalma masakat, Jang Salim ninggalan duit.
Sidekah anu dimaksud, nu satalen nu saketip, hajat teu make pangarah, kaluar ti welas asih, reh ngingetkeun ka dirina, keur waktu sangsara miskin.
Saenggeus kapapay tuluy, Ujang Salim terus balik, ka Mas Saca geus nyarita, poe isuk baris balik, paket ku Salim dibuka, nu eukeur ka ibu ngirim.
Samping hiji katut baju, dibikeun ka Nyimas Umi, nu sapangadeg dibuka, dihajatkeun ka paraji, surutuna ka Mas Saca, barungaheun liwat saking.
