Galihna jeung Ujang sami, jawab Ujang Salim duka, ku abdi acan katoong, wireh acan sasarengan, ngan bae susuganan, di Batawi pareng tepung, ku abdi rek diteangan.
Sareng sajabina deui, upami taya pambengan, wireh abdi kenging wartos, nurut raratan carita, sim abdi di Pandeglang, aya wartos gaduh dulur, jeung abdi tunggal sabapa.
Sadongkapna ka Batawi, bade permisi ka tuan, maksad abdi teras mios, bade mapay dulur tea, nu aya di Pandeglang, Den Wiryadi oge tangtu, ku abdi bade dipapay.
Mas Saca jeung Nyimas Umi, walon sukur mun kitu mah, mugi sing kapanggih bae, caturkeun bae enggalna, Salim dinten Rebona, saenggeus pamitan tuluy, mangkat ka Mester rek mulang.
Di jalanna teu diwarti, catur bae enggeus datang, ka pos setatsiun Mester, nyampak Yus jeung Dolf mapag, nona Edith tiluan, barang Ujang Salim turun, sono pada tatabean.
Ka Matraman trus arindit, nyampak tuan reujeung nyonya, di jalan eukeur ngalejeg, megat anu dararatang, gancang nyonya jeung tuan, ka Salim pada maruru, sarta tuluy tatabean.
Saur Nyonya sukur Alim, salamet taya kakurang, indung reujeung adi maneh, urang enggeus meunang beja, dina suratna Lurah, walonan surat ti ditu, ku urang enggeus katampa.
Bareng pisan Alim indit, ari mangkat surat datang, ku urang dibuka bae, tina hayang geura terang, urang kacida bungah, kumaha kabar di ditu, sugan aya sejen beja.
Jang Salim ngawalon manis, nganuhunkeun bageana, ku Jang Salim dicarios, sakur lalampahanana, satungtung di lemburna, Jang Salim pada ngariung, ditaranggap lalakonna.
Salim kaduhungeun teuing reh potret anu tujuhan, teu kabawa tina poho, tinggaleun dina enggonna, pintonkeuneun ka nyonya, ngan potret ramana wungkul, ku Salim anu kabawa.
Nyorangan eukeur ngaginding, keur waktu jagjag waringkas, cakep masih anom keneh, Salim oge acan aya, manehna henteu terang, naha geus kawin jeung ibu, eukeur waktu dipotretna.
