Tuluy potret ku Jang Salim, dipintonkeun ka tuanna, lajeng ditingali bae, duaan sareng ku nyonya, Dolf Edith teu tinggal, nyonya nyaur bari imut, bapa maneh estu gandang.
Ceuk Salim maksad sim abdi, ieu potret rek dibawa, ka payuneun tuan Jasper, supaya jadi uninga, yaktos leres-henteuna, jeung bapa abdi kapungkur, didamel geus sasarengan.
Upami parantos sidik, urut rencangna anjeunna, tinangtos sim abdi yaktos, gaduh dulur nu sabapa, nu aya di Pandeglang, nu katelah nami Usup, estu abdi hoyong terang.
Sim abdi hoyong ngilari, lamun nyonya ngawidian, waktos senang tina gawe, bade mapay ka Pandeglang, hade saurna nyonya, lamun enya enggeus puguh, geus tangtu urang ngidinan.
Song Salim nyanggakeun duit anu lima puluh tea, pasihan nyonya bareto, ceuk Salim nyanggakeun arta, anu pasihan tea, ku abdi deui kabantun, weuteuh taya kakirangan.
Dupi ongkos-ongkos abdi, cekap nu abdi sorangan, anu keur pun biang bae, nu saratus perak tea, ku sim abdi dibuka, malah masih seueur langkung, sesa ongkos sareng hajat.
Nyonya nyaur deui manis, baruk sesa pake hajat, naha Alim hajat naon, Jang Salim deui ngajawab, mere ka nu masakat, ka pamili sareng batur, anu hirupna walurat.
SINOM.
Wirehing abdi baheula, ngaraoskeun jalma misikin, bungah teu aya hinggana, lamun aya nu miasih, hajat mere rejeki, najan henteu matak cukup, menggah perkawis eta, sadungkapna jisim abdi, sakur batur nu miskin disidekahan.
Niat abdi seja hajat, nu satalen nu saketip, tatangga nu teu baroga, ku abdi sami dibagi, barungaheun teh teuing, nyonya muji bari imut, sukur lamun kitu mah, tanda Alim welas asih, boga hate sipatna kamanusaan.
Amal Alim moal mubah, babales tangtu kapanggih, saratus kali nya bungah, nu nampa sidekah Alim, sewu kali Yang Widi,
