Kabeneran eukeur luntrak-lintrik, upas onder anu keur ngajaga, ku Salim ditanya bae, upas mere pituduh, Ujang Salim geus tuluy indit, ngaboseh sepeldahna, perenahna ngidul, lumampahna gagancangan, catur bae pukul opat kurang leuwih, ka Petir enggeus datang.
Nu diburu-buru ku Jang Salim, imah jaro nu aya di dinya, caturkeun bae geus amprok, Salim barang patepung, terus nanya ku basa manis, pokna nu mawi dongkap, ka dieu ngajujug, mang Jaro manawi terang, ku sim abdi aya anu dipilari, reh di dieu linggihna.
Nami Usup asal urang Petir, barang Jaro ngadenge pananya, gancangna ngajawab bae, dupi nu nami Usup, eta putra majikan haji, Assistent pangsiunan, bumina teu jauh, ti dieu oge katingal, katelahna ramana majikan haji, Tubagus Sukranata.
Nu kagungan putra waktu alit, nya Tubagus Usup kasebatna, Ujang Salim rada bengong, wireh anu disebut, ku Jaro sangka Salim lain, sabab Usup eta mah, titelna Tubagus, tur cenah puguh ramana, ceuk Jang Salim naha henteu aya deui, nami Usup nu lian.
Walon Jaro henteu aya deui, di dieu mah Usup teh ngan eta, sumangga dicobi bae, disampeurkeun ka ditu, mangga sareng mamang nu ngiring, Jang Salim walon mangga, sarta semu bingung, asa erek asa moal, panyangkana sabab geus tangtuna lain, Usup nu diteangan.
Ngan kapaksa reh jaro geus indit, ka jro imah dangdan dibaju jas, gancang tuluy mangkat bae, Jang Salim mundur-maju, bari nyered sepeldah indit, barang nepi ka latar, Salim eureun nangtung, sarta nyekel sepeldahna, Mas Jaro mah terus ngadigdig ka bumi, bade unjukan heula.
Henteu lami enggeus balik deui, ka Jang Salim miwarang ngantosan, wireh majikan Assistent, di cai eukeur wulu, ceuk Mas Jaro sumangga linggih, lebet tong era-era, di ditu di payun, moal lami ge kaluar, Ujang Salim barang eukeur mikir-mikir, katingal nu ngulangan.
Ti jro bumi nyaur linggih-linggih, Ujang Salim tuluy bae
