lamun nurutkeun ka umur, budakna nu ditilar, enggeus sedeng boga rabi, dua puluh lima taun henteu kurang. Enya eta Usup tea, diinguna ti leuleutik, mama anu ngurusanan, nyasatna anak pribadi, ayeuna di Batawi, matuhna geus opat taun, geus nyekel pagawean, sarta ngaranna dilandi, katelahna Wiryadi ngaran ayeuna.
Jang Salim hatena nyeblak, ngadenge ngaran Wiryadi, ngomong sajero atina, asa kabeneran teuing, moal salah Wiryadi, nu jeung aing enggeus tepung, pijodoeun Salamah, ku aing bakal kapanggih, aing untung ditepangkeun jeung uana.
Na' di mana didamelna, putra Tubagus Wiryadi, kitu Jang Salim narosna, pribumi ngawalon deui, opnemer di Batawi, di B.O.W. Mantri Ukur, kantorna Gang Katapang, Opzichterna tuan Berling, Ujang Salim atoh meunang katerangan.
Ngomong sajero atina, ya Allah teu nyana teuing, sihoreng teh sadunungan, ngan teu sagawe jeung aing, lamun nyaho ti tadi, bareto ge enggeus tepung, boa mah Encep Tarlan, reureujeungan jadi hiji, duh hanjakal henteu nyaho ti tadina.
Ujang Salim. teu nyarita, ngan wungkul di jero ati, tuluy deui pura-pura, naros deui ka pribumi, na' can kagungan istri, pribumi deui ngawangsul, nya eta henteu acan,ngan ka mama geus wawarti, rehna ngaku enggeus boga papacangan.
Ceuk Salim ka urang mana, pribumi ngawalon deui, ka mama henteu bebeja, rupana dibuni-buni, ngan ka mama geus ngirim, potretna nu rek dimaksud, Jang Salim geus teg nyangka, potret nu disangka tadi, moal salah tangtu ibu jeung Salamah.
ASMARANDANA.
Ujang Salim naros deui, pura-pura nu teu terang, kumaha galih nu yaktos, menggah emutan gamparan, perkawis putra tea, naha rempag nurub cupu, sareng papacanganana.
Pribumi ngawalon deui, ari ningal rupana mah, estu rempug reujeung hate, wallahu 'alam adatna, eta acan karuhan, ku mama anu dituju, hayang meunang ka turunan.
