Anu mawi abdi ceurik, tina bawaning baluas, teu emut ngucur cipanon, menggah ieu potret tea, ari sayaktosna mah, pun biang sareng pun dulur, ayeuna aya di Mekah.
Jadi estu dulur abdi, papacangan tuang putra, abdi nembe terang yaktos, tuang putra aya niat, misuka ka Salamah, reh jeung putra acan tepung, jeung abdi babadamian.
Malahan abdi ngilari, nya eta ka tuang putra, wirehing kapungkur amprok, sareng abdi di Karawang, malah aya jangjina, ka abdi sumeja nulung, rek masihan padamelan.
Kalih perkawisna deui, wirehing abdi papisah, sareng sobat anu sae, eta nu aya di dinya, dipotret sasarengan, nu nangtung beulah katuhu, katelahna Encep Tarlan.
Jadi kaleresan teuing, abdi tepang jeung gamparan, kawuwuh kenging carios, anu ngajadikeun bingah, abdi sadongkap-dongkap, tuang putra rek diburu, ka kantorna dite pangan.
Ti dinya mah Ujang Salim, nyariosna ngabaralang, teu aya anu dipegeg, sakur anu geus kasorang, malah disangka ajal, ku Ujang Salim dicatur, ditutur asal-usulna.
Pribumi ngadaweung nguping, bengong ngadangu carita, muji ya Allah ya Alloh, mama banget henteu nyana, bakal jadi baraya, mugi Wiryadi sing tulus, jadi jodo ka Salamah.
Jero galihna pribumi, raos asa kabeneran maksudna bade marios, turunanana Salamah, ibu sareng ramana, ayeuna pareng patepung, panggih jeung dulurna pisan.
Ti dinya mariksa deui, naha ari tuang rama, anu enggeus dicarios, na' saha jenenganana, Asep acan nyarita, Jang Salim deui ngawangsul, Sobari nami pun bapa.
Malahan ieu ku abdi, potretna teu ara tinggal, dibabantun saban poe, nya eta keur katerangan, malar pun dulur ningal, anu ku abdi disusul, kangge saksi dulur tea.
Potretna ku Ujang Salim, seug dikodok tina pesak, tuluy disanggakeun bae, pribumi barang breh ningal, melong potretan tea, galihna sanget ngaranjug, ngeter munggah potret murag.
