Ibu oge teu cacatur, asal-usul bapa aing, kawas aya rasiahna, nu perlu dipinding-pinding, Salim banget panasaran, naon anu jadi margi.
Jang Salim jongjon melenguk, juragan Assistent Haji, ngandika jeung gogodegan, duh Asep teu nyana teuing, estuning lalakon Ujang, anehna kaliwat saking.
Teu nyana satungtung rambut, jeung mama bakal papanggih, geus kitu karsaning Allah, rek nepungkeun malar rapih, tur mahluk teu bisa terang, rea nu teu matak ngarti.
Untung ku kersa Yang Agung, diri Asep mawa bukti, potretan mama teu tinggal, mun euweuh samar kapanggih, moal rek nyaho ka mama, ka dulur ka dulur nya kitu deui.
Meureun Wiryadi teh tulus, jadi reujeung dulur kawin, lantaran ku ganti ngaran, mama ujang waktu tadi, Tubagus Bisri ngaranna, diganti jadi Sobari.
Salim ngupingkeun ngaheruk, ngahuleng olohok cicing, nu aya ngan bati heran, inget ka laku pribadi, atina muji ka Allah, nganuhunkeun maksud hasil.
Ceuk Jang Salim abdi ewuh, naon anu jadi margi, pang pun bapa luluasan, nilarkeun ka kadang-wargi, teu emut ka asal tempat, dugi cul sama sakali.
Menggahing abdi mah estu, teu terang sama sakali, asal-asalna pun bapa, pun biang henteu wawarti, kawuwuh kurang tatanya, ari panginten sim abdi.
Di Sukasarina matuh, turunan ti nini-aki, asal-usul urang dinya, abdi teu nyangka teh teuing, sugan teh sanes ngumbara, urang Banten nu sajati.
Sipat ramana ngawangsul, kieu ceuk beja nu sidik, reh mama mah keur teu aya, waktu jadi jurutulis, aya di sejen nagara, pajauh teu jadi hiji.
Mama Asep hiji waktu, kagoda rancana iblis, kapincut ku hiji randa, sugih urut nyai-nyai, gulet-ruket bobogohan, mehmehan ka bojo lali.
