Tina ku lantaran kitu, mama mah teu balik deui, diteangan teu kapendak, bojona indung Wiryadi, nya ku mama dirawatan, nepi ka budakna lahir.
Sanggeus bojona ngajuru, ngajurukeun Ki Wiryadi, maksa teu beunang ditahan, keukeuh bae erek indit, rek neangan salakina, ku lantaran bela pati.
Sanggeus anakna teu nyusu, maksa bae tuluy indit, nya mama anu miara, indungna kaluli-luli, neangan saparan-paran, ti dieuna ka Batawi.
Mama weleh nunggu-nunggu, ka bojona datang deui, nepi ka ayeuna pisan, ambleng henteu balik-balik, nu neang nu diteangan, luput henteu manggih warti.
Tah lantaranana kitu, kawit mama Asep indit, mama teh ngan bati welas, ka anakna Ki Wiryadi, teu nyaho di indung-bapa, nepi ka waktu kiwari.
Ngan nyaho potretna wungkul, waktu anyar keneh kawin, malah henteu ara tinggal, dibabawa ku Wiryadi, ieu di mama ge aya, potret anu hiji deui.
DANGDANGGULA.
Tuluy potret dicandak ti bumi, ku Jang Salim lajeng ditingalan, melong jeung ngucur cipanon, tina welas jeung emut, ka rakana nelah Wiryadi, yen kitu lalakonna, teu uninga ibu, sumawonna ka ramana, anu aya ngan nyaah welas jeung asih, emut ka salirana.
Diwawaas ngahelas jeung sedih, mana teuing lamun enggeus tepang, reujeung Den Wiryadi amprok, Salim tungkul ngaheruk, ningal potret dirurak-ririk, teu lesot 'na leungeunna, cipanonna nyangkrung, manahna anu kacipta, ngan rakana Usup Tubagus Wiryadi, geus asa sagokgokan.
Ramana ge anu nya nyanding, milu ngangres kagagas baluas, sarta rambisak cipanon, ceuk Jang Salim panuhun, saupami aya paidin, menggah ieu potretan, sumeja dibantun, manawi jadi
