ratug, Den Wiryadi mariksa, bari melong raray Salim, neuteup wireh asa-asa enggeus tepang.
Naha di mana nya lenggah, asa-asa prantos sering, sareng pun engkang patepang, ceuk Salim prantos manawi, kawit mah jisim abdi, di Sukasari nya matuh, di dieu keur ngumbara, Den Wiryadi kaget nguping, ras emuteun ka lemburna papacangan.
Galihna rada sumeblak, inget ka nu dipiasih, Salamah anu di Mekah, ka Salim neuteup ningali, kutan ti Sukasari, nyaur galihna jeung ratug, neuteupna henteu owah, reh rada emut ka Salim, tatapina tetep lain panyangkana.
Sabab tetela geus ajal, galih Tubagus Wiryadi, piraku nu nilar dunya, bisa hudang hirup deui, terus narosna manis, mugi henteu jadi bendu, manawi rai kenal, jeung Mang Lurah Sukasari, nu kagungan istri ka Embi Patimah.
Jang Salim walon kantenan, jeung abdi sanes nu tebih, malah aya kasebatna, kaetang rada pamili, rorompok abdi ugi, teu misah nyasat pacampur, ngahiji saburuan, malah pang ka dieu abdi, nu dimaksad ngadongkapkeun piwarangan.
Samemeh angkat ka Mekah, aya pesenna ka abdi, supaya abdi nepangan, wireh memeh munggah haji, anjeunna prantos nampi, serat ti Wijkmeester nyatur, anu kageleng tea, aya deui nu ngilari, urang Tanjung anu leungiteun budakna.
Tina ku perkawis eta, nyariosna ka sim abdi, bilih Salim masih aya, mundut tulung diilari, sarta lamun kapanggih, ku gamparan angken dulur, ulah rek asa-asa, sareng sajabina deui, reh gamparan sasarengan jeung Cep Tarlan.
Pamugi kersa ne pangan, sareng carioskeun deui, lebet saungeling serat, supados nulung ngilari, malah ku jisim abdi, ka Cep Tarlan rek dicatur, na' di mana ayana, Den Wiryadi pok ngalahir, Encep Tarlan ka Bandung parantos pindah.
Jalaran kaanggo pisan, ku tuanna dipiasih, tuanna pindah dibawa, engkang ge bungah teh teuing, wirehing waktu tadi, memang engkang anu nulung, engkang leungiteun pisan, wireh jeung engkang ngahiji, malah-malah di dieu pisan matuhna.
