Salim ngadaweungna lila, pikirna hanjakal teuing, wireh Encep Tarlan pindah, sugan teh bakal kapanggih, pikirna Ujang Salim, erek nyuratan ka Bandung, Den Wiryadi ngandika, rasa engkang putra embi, bingung temen jalanna pikeun neangan.
Saperkawis reh pun engkang, meureun tangtos lepat deui, moal rek tenget rupina, najan parantos papanggih, kalih perkawis deui, reh meh dua taun langkung, jeung engkang henteu tepang, kapungkur 'na kreta api, ngan saliwat tepang waktos di Karawang.
Puguh lamun kapendak mah, najan teu carios embi, kudu diangken ku engkang, engkang oge aya wajib, ka manehna miasih, wantu bakal jadi dulur, mun pareng kajadian, jadi urang Sukasari, Den Wiryadi teu neruskeun cariosna.
Salim nuhun ngawalonan, jero hatena mah seuri, abdi oge prantos terang, kenging wartos jisim abdi, gamparan rek ngahiji, jang Salim rada a. i. u, meh-mehan kapohoan, nyebut jeung pun dulur kawin, tuluyna teh nuhun mugi kajadian.
Den Wiryadi semu bungah, sarta ngawalonan deui, nya eta anu diteda, mugi maksad engkang hasil, ngan anu jadi pikir, engkang lami kudu nunggu, sareng rada salempang, reh serat ti Sukasari, ti ibuna maksadna teu pati terang.
Ngawalon pamenta engkang, unina estu saeutik, ngan kudu antos umurna, reh waktuna acan manjing, kana boga salaki, lantaran budak pahatu, engkang leuwih salempang, reh sakitu ungel tulis, kuma' terang ayi sugan ngajugjugan.
Wireh tunggal saburuan, sugan nyarios ka ayi, rempag atawa henteuna, Salamah jeung engkang kawin, Jang Salim rada seuri, nginget-nginget keur ngawangsul, pok deui Salim jawab, menggah paningal sim abdi, rupina mah semu nu rempageun pisan.
Ngan saeutik hanjakalna, saur sepuhna ka abdi, patepang kakara terang, jeung gamparan di Batawi, karepna hayang nungtik, turunanana ti ditu, terah slira gamparan, reh ibuna langkung apik, wantu-wantu turunan ahli agama.
