Malahan ieu ku abdi, potretna teu ara tinggal, dibabantun saban poe ceuk Wiryadi cobi ningal, engkang ge hayang terang, lajeng Salim ngodok saku, ku Wiryadi ditampanan.
Barang Wiryadi ningali, ngagebeg jero galihna, emut ka rama nu lolos, wireh teu benten rupina, Wiryadi henteu nyangka, yen potret ramana estu, nu aya ngan bati heran.
Potret dibulak-dibalik, dipencrong diawas-awas, wireh rupina teu geseh, jeung potret ramana pisan, anu duaan tea, keur ngarendeng sareng ibu, galihna raos sumeblak.
MASKUMAMBANG.
Ujang Salim ningal pameunteu Wiryadi, semu nu kagagas, melong kawas nu keur mikir, song Salim masrahkeun serat.
Barang surat ku Den Wiryadi ditampi, samemeh dibuka, adresna seug ditingali, serat tulisan uana.
Den Wiryadi beuki ratug jero galih, lajeng wek dibuka, sarta diaos sakali, kieu salebeting serat.
Surat ieu supaya nyaho Wiryadi, diburu gancangna, ieu anu mawa tulis, Tubagus Salim ngaranna.
Dulur Asep pisan anak mama Bisri, ka Pandeglang datang, maksudna erek ngilari, dulur nu tunggal sabapa.
Nya buktina dulurna maneh pribadi, hal perkara eta, mun Wiryadi hayang sidik, nu terang asal-usulna.
Hade tanya bae ku maneh pribadi, supayana terang, sajabana kitu deui, ama ka Asep popoyan.
Poma ulah rek pisan dipake ati, reh bapa geus ajal, mama ge teu nyana teuing, bakal panggih jeung anakna.
Sabab kitu poma Asep sing prihatin, jeung pamenta mama, jeung dulur Tubagus Salim, sing runtut silih belaan.
Wireh Asep henteu boga dulur deui, nu baris bumela, ayeuna geus pada yatim, estu Asep kabeneran.
