Jisim abdi teu nyana kaliwat saking, estu kaleresan, mun pun adi teu ngilari, tangtos meureun kajadian.
Jisim abdi sinareng pun adi kawin, reh putrana dua, anu ieu nami Salim, adina nya Nyi Salamah.
Ku jalaran pun bapa diganti nami, Sobari namina, mun pun bapa teu diganti, meureun kapungkur kapendak.
Sakalangkung kagetna pribumi nguping, bari gogodegan, masa Allah aneh teuing, kutan nepi ka kituna.
Kawas lain lalakon jaman kiwari, siga nu baheula, dina wayang remen nguping, jeung dulur pada teu terang.
Pribumi ge panasaran hoyong nguping, ti asal purwana, kawitna Salim ngilari, kapendak raratanana.
Ujang Salim pok nyarios langkung titi, ti asal-asalna, nepi ka waktu ngilari, mapay dulur ka Pandeglang.
Decaturkeun keur waktu mapay di Petir, tepang jeung uana, ku Ujang Salim diwincik, ti awal nepi wekasan.
DANGDANGGULA.
Den Wiryadi henteu eureun nangis, ngadangukeun carita rama, angot keur waktu nyarios, ramana tujuh taun, nombro payah kenging panyakit, hirup nandang balangsak, nepi kana pupus, malah-malah dicarita, waktu hilang tina ku lantaran miskin, rurub oge teu aya.
Sajabana dicarios deui, lalakonna ibu jeung anjeunna, saprantos ramana maot, dijantu payah teu kalarung, tatag beres carios Salim, sakur laku-lampahna, kabeh dipicatur, cariosna matak welas, pribumi ge di dinya nu sami nguping, milu bijil cisoca.
Urang bujeng bae nu digurit, teu dicatur sosonoana, Jang Salim geus balik bae, ngawula tambah suhud, ngalakonan gawe paranti tuan tambah asihna, diajarna cucud, ngulik sakur pangajaran, nu perelu supaya lulus di ahir, eksamen klein ambtenaar.
