henteu tinggal, catur ka Bandung geus tepi, samemeh ngeusi bumi, di hotel heula nya matuh, isukna sanggeus datang, Dolf tuluy bae indit, ka assistent-resident trus ngadeuheusan.
Bangsa pangageng dipapay, ka resident kitu deui bopati geus ditepangan, damel rapih geus ditampi, bumina geus dieusi, aspiranan beres rampung, ibuna nu mapajang, ngan saminggu tuluy mulih, Ujang Salim nu neruskeun rumah tangga.
Bujengkeun bae enggalna, kalakuan Ujang Salim, saprantos ka Bandung pindah, bumen-bumen siga istri, tuan Aspiran leuwih, percanten siga ka dulur, urusan rumah tangga, dipasrahkeun ka Jang Salim, babalanja ka koki jongos marentah.
Suhud ngurus pagawean, metakeun parentah titi, saregep kumawulana, dunungan katambah asih, sagala hal badami, Jang Salim tara dikantun, malah upama tuang, ngariung tara patebih, kitu deui sare sakamer duaan.
Salim lamun geus marentah, kaperluan keur di bumi, geus dangdan tuluy bral mangkat, ngantor mantu jurutulis, ngamagang geus mimiti, lamun mulang pukul satu, gancang tuluy sadia, ngajaga meja sayagi, mun geus beres tuluy dahar babarengan.
Meh euweuh tempo nepungan, ka Tarlan sobatna dalit, hatena asa gokgokan, geus asa prok bae panggih, caturkeun hiji peuting, tuan ka Jang Salim nyaur, Salim peuting isukan, kudu sakola mimiti, rehna urang ka guru enggeus nyarita.
Guru nu biasa ngajar, sakolaan partikulir, pikeun sakur urang Sunda, ari ngajarna ti peuting, ti pukul genep kawit, jam dalapan karek tutup, lilana ngan dua jam, gunana engke di ahir, malar meunang kana samen klein ambtenaar.
Salim asup tangtu pisan, moal ka kelas mimiti, geus tangtu ka pangluhurna, kari nuluykeun saeutik, rasa urang pribadi, moal kosi ku sataun, tina ku sabab eta, isuk reujeung urang indit, babarengan dianteurkeun ka sakola.
Jang Salim bungaheun pisan, nganuhunkeun ka pangasih, kacatur poe isukna, pabuburit geus arindit, angkat bari pelesir, ka
