sakola nu dijugjug, Aspiran sasumpingna, jeung tuan Guru badami, nu diajar kolot jeung barudak bujang.
Kacaturkeun Encep Tarlan, sakolana enggeus lami, ti barang ka Bandung pindah, nya eta di partikulir, Tarlan barang ningali, ka Salim munggah ngaranjug, reh Salim can nyuratan, nyaturkeun lampah pribadi, Tarlan bengong ngadaweung dina bangkuna.
Ningal Salim sareng tuan, Salim mah acan ningali, ka Tarlan anu di dinya, ma'lum tina rea murid, tuan Aspiran mulih, Salim mah sakola terus, di kelas pangluhurna, jeung Tarlan henteu ngahiji, misah kamer sakolana masih handap.
Tarlan sajero diajar, teu weleh ngadaweung mikir, inget ka sobat-dalitna, anu enggeus ajal lami, teu nyangka eta Salim, reh geus beda ti kapungkur, tindak reujeung rupana, lantaran gagah jeung ginding, jro pikirna nu aya ngan bati heran.
Wireh rupana sarimbag, teu pisan beda saeutik, tapi leuwih panasaran, Encep Tarlan hayang sidik, pikirna ari bijil, ku Cep Tarlan rek ditunggu, upama henteu salah, geus tangtu nanya ka aing, sugan moal pohoeun deui ka rupa.
Kitu Cep Tarlan pikirna, reh nyangka paeh teu sidik, bujengkeun bae enggalna, murid-murid geus barijil, Ujang Salim nyengceling, reh acan boga kawawuh, barang datang kaluar, Cep Tarlan ngajanteng cicing, ngan sorangan nenggang nangtung di nu caang.
Barang Ujang Salim ningal, ngagebeg jeroning ati, ningal Tarlan asa-asa, sarua papada pangling, wireh beda ti tadi, urut rupa anu kusut, ayeuna jadi gagah, tungtungna papada cicing, ngadaraweung duaan patingal-tingal.
Salim anu miheulaan, nyampeurkeun ka Tarlan gasik, nyolondo bari jeung nanya, pokna henteu jadi galih, reh rada lepat deui, bisi sim abdi kaliru, anjeun sanes Cep Tarlan, barang Encep Tarlan nguping, sidik Salim gabrug bae ngarangkulan.
KINANTI.
Jang Salim deui nya kitu, tina sono liwat saking, pabetot-betot
