klein ambtenaar, Jang Salim enggeus pupulih, ka guruna jeung dunungan, hayang milu nyobi-nyobi.
Ku guruna geus dijurung, geus kataksir bakal hasil, sedeng cukup pangartina, waktuna Jang Salim ngiring, sarta lulus eksamenna, ruim voldoende perkelaring.
Guruna bungaheun langkung, dunungan mah komo deui, nyalametkeun mere tangan, Salim ngaranna diganti, Tubagus Raksasujana, dina diploma ditulis.
Hartina Raksa disebut, nurut kana basa Kawi, tukang ngaraksa ngajaga, hartina Sujana: 'alim, iatna, bageur Sundana, jelema hade berbudi.
Ujang Salim enggeus barbur, ngirim surat ka Batawi, bebeja eksamen meunang, ka tuan Berling kahiji, sumawonna ka rakana, Usup Tubagus Wiryadi.
Kabeh pada ngawarangul, nyalametkeun ka Jang Salim, komo ti tuan Berling mah, suratna panjang teh teuing, ditembongkeun kabungahna, nyonya jeung Edith narulis.
ASMARANDANA.
Henteu mangkuk lami deui, sanggeus meunang eksamenna, ngan sataun lilana teh, Salim benum naek pangkat, kabeneran teu incah, dibenum di kota Bandung, Jurutulis Karsidenan.
Bungahna geus lain deui, anu teu aya hinggana, wireh masih keneh ngantet, teu papisah jeung dunungan, tuan Aspiran tea, tetep bumen-bumen tuluy, sakumaha biasana.
Aspiran katambah asih, beurang-peuting rerentetan, mun keur senang tina gawe, wantu pada bubujangan, Ujang Salim gajihna, weuteuh lantaran dicukup, dahar sarena dituan.
Kacatukeun lami-lami, sanggeus Salim jadi pangkat, mangkuk bubulanan bae, tuan Aspiran ge pindah, ngalih ka Jawa Tengah, jadi Controleur dibenum, kapaksa jeung Salim pisah.
Lain dikieuna deui, nu nilar jeung nu ditilar, tangtos pada sedihna teh, ma'lum papisah jeung sobat, nu sakitu dalitna, nyasat enggeus jadi dulur, ti leuleutik reureujeungan.
