salapan ngajajar, leter W.-na tingbuncelik adu manis, anggon kajrutulisan.
Lapat-lapat kapal katingali, estu matak waas jeung baluas, ningal kapal nu nyoloyong, katingal ti nu jauh, tarik ngirig meulahkeun cai, dina dek kapal ningal, ngumpul nu narangtung, nararempo ka daratan, haji-haji nu marulih munggah haji, keketuna barodas.
Bangun waas kagagas jeung sedih, atoh ningal pulona sorangan, komo lamun enggeus anjog, ka tempat lembur matuh, najan karek sami ningali, pulona Tanah Jawa, bungahna kalangkung, sukan-sukan tinggarupay, anu mapag jeung anu masih di cai, pada ulang-ulangan.
Kacaturkeun kapal enggeus tepi, kabeneran pisan balabuhna, adek pisan ka sisi dek, nu mapag jeung nu turun, henteu kosi marahu deui, ear sora jelema, di handap di luhur, campur jeung sora kerekan, brongbrang barang kuli-kulina pabuis, maruru ka jro kapal.
Jamaahna di jro heurin usik, padedesek hayang pangheulana, maruru naek kana dek, di luhur geus ngaliud, aya anu ngelek ngajingjing, rupa-rupa polahna, istri tingpecenghul, pada dikarukudungan, balalewuk anggoan taya nu bersih, lodro ku kokotoran.
Raka-rai Raksa jeung Wiryadi, ningalian ka sakur jamaah, anu di laluhur keneh, galihna tugteg ratug, reh ibuna can katingali, sumawonna Mas Lurah, wantu masih ribut, gudag-gidig ngulon-ngetan, barang breh teh anu kawit katingali, Mas Lurah jeung Salamah.
Langkung bungah Tubagus Wiryadi, sumawonna Tubagus Raksa mah, barang breh enggeus katembong, Mas Lurah reujeung ibu, gegeroan maruka peci, ti handap ngulang-ngulang, nyaur uba-ibu, tapi nu diulangan mah, jongjon bae ngan ukur sami ningali, henteu dipirosea.
Taya pisan pangraos jro galih, nu ngulangan eta teh putrana, nyangka ka nu sejen bae, kawuwuh masih ribut, turug-turug Tubagus Salim, nganggo anggoan menak, galih rama-ibu, naksirna
