ngariung, semuna anu era, ningal rakana Wiryadi, uman-imen maklum reujeung papacangan.
Barang tamat nyariosna, Tubagus Raksa wawarti, yen Wiryadi saderekna, tuluy dirontok Wiryadi, nyaurna bari nangis, sasambatna udah-aduh, henteu nyana teu nyana, pimantueun anak aing, sihoreng teh Ujang ka dulur nanyaan.
Kitu deui Nyi Salamah, ngadaweung kawas nu ngimpi, sanggeus nyaho rasiahna, seug nyolondo ka Wiryadi, bari bijil citangis, sasalaman tapak deku, bari menta hampura, ditampanan ku Wiryadi, sarta bari jeung diusapan sirahna.
Sedih ditungtungan bungah, tungtungna arimut manis, garumujeng sadayana, tina teu nyana teh teuing, bakal jadi ngahiji, kumpul riung sadudulur, bujeng bae enggalna, sono teu dicatur deui, kacaturkeun enjingna terus marangkat.
Tunggang kreta pangenjingna, marulih ka Sukasari, Den Wiryadi henteu tinggal, di jalanna teu kawarti, catur bae geus tepi, ka pos T anu dijugjug, nagara nu ngabawah, nya eta ka Sukasari, ratus-ratus nyampak jalma anu mapag.
Ma'lum anu rea sobat, sami jaler sareng istri, keur mah urut jadi lurah, teu perlu dicatur deui, jelema heurin-usik, leumpang henteu kaur maju, nampa nu sasalaman, caturkeun bae geus tepi, nyampak beres di Sukasari sadia.
Jalma meh teu kaladenan, nu datang beurang jeung peuting, ngabageakeun nu datang, henteu petot ganti-ganti, barang geus tilu wengi, anu rabul rada suwung, hol Encep Tarlan datang, bareng jeung ibuna sumping, sadayana pribumi sami mariksa.
Ka ibuna Encep Tarlan, wireh nembe taringali, wantu linggihna di kota, lalakonna rada tebih, pernah ti Sukasari, ka kota tilu pal langkung, saprantos dibejaan, pada sasalaman sami, Den Wiryadi barang tepang jeung Cep Tarlan.
Teu kinten bae sonona, wireh batur sobat dalit, nu geus lami henteu tepang, sadaya karulem sami, henteu enggal marulih, Tarlan ka ibu cacatur, reh Den Wiryadi tea, eta nu bela ka abdi, anu nulung kawit mere padamelan.
