Pangkur
1. Aria Patih Ambarak, ulak-ilik ka dirina pribadi, bari nandang heran bingung, sarta leuwih pěrtjaja, kana watĕk agama matak rahaju, tina bukti ngadak-ngadak, leungitna eta kasakit.
2 Teu lila tĕrus undjukan, Arja Kumba ka Sang Nurasadjati, sarta dibarung ku sudjud, duh gamparan Sang Putra, djisim abdi rebu-rebu katur nuhun, mĕnggah ka lĕnggah gamparan, aja piwĕlas ka abdi.
3. Masihan dikawarasan, dugi sehat ilang kabeh kasakit, geusan nungtun kana lampus, tina lintang nistana, margi eta djisim abdi anu estu, maksud gaduh panadaran, ka lĕnggah gamparan jakti.
4. Ti waktos ieu ngawitan, satĕrasna dugi ka mangsa pati, sumĕdja tumut sumudjud, sadrah raga djeung njawa, lahir batin moal serong laku palsu, mĕnggah ka kĕrsa gamparan, sumpah taruh baja pati.
5. Upami sim abdi tjidra, ka gamparan mugi Jang Maha Sutji, ka diri sim abdi estu, nurunkeun sipat bahja, turun-turun dumugi ka anak-intju, kitu abdi patekadan, ka kĕrsa gamparan jakti.
6. Sang Putra Purnama Alam, ngadangukeun tjarita Arja Patih. sĕrah badan maksud tumut, dibarĕngan ku sumpah, hanteu lami Sang Putra ladjĕng ngadawuh, ka Aria Patih Kumba, dibarung pasĕmon manis.
7. Mĕnggah paman aja manah, anu langkung rido teu aja tanding. ka putra anu saestu, miwĕlas sapaosna, putra nampi sarĕng rebu-rebu nuhun, malah diiring panĕda, salamĕt lahir djeung batin.
8. Barang geus tamat wawarta, Radjaputra ka Kumba Aringäring, ngalirik ka Mantri Ratjun, sarta bari ngandika, geuning kieu balukar nu rek dihukum, menta pangampura kula, tanda geus babalik pikir.
9. Ngadjalankeun kasĕtyaan, atuh kudu urang merean adil, ka nu sumpah taruh lampus, ku sabab eta kula, arek menta timbangan pramantri istu, ka ieu paman Aria, Patih Kumba Aringäring.
10. Mantri Ginggi ngawangsulan, mĕnggah eta sim aþdi mah mung ngiring, sakĕrsa gamparan kitu, masihan pangadilan, hanteu tjios dianggo parabna ratjun, amung sim abdi panĕda, gamparan pamugi-mugi.
11. Kĕdah rĕrĕmpagan heula, sarĕng rai Sang Adjĕng Aju Putri. nu kagungan Bungbungümur, tina margina eta, nu kagungan tangkĕpan anu saestu, abdi darma piwarangan, ngahukum Aria Patih.
12. Sang Radjaputra ngandika, na di mana ajeuna Ratu Putri, kaula
