Ieu kaca geus divalidasi
37
- Ajeuna parantos timbul, tatjan gěntos sasih deui, geus nandang marga tugěnah, mung měnggah emutan abdi, kapamběng nandangan bahja, teu gimir ku nindih pati.
- Nadjan lampus pěgat umur, moal panasaran pikir, supados asal bumela, ka lěnggah gamparan jakti, ajeuna sumangga enggal, ka nagri tong risi-risi.
- Gamparan nu nandang pupus, abdi anu ngiring mati, gamparan nu nandang lara, abdi anu njangking njěri, sumawon gamparan bingah, kantěnan abdi nu seuri.
- Pangeran Pinutra njaur, atuh sukur teuing Njai, boga tekad pasanggupan, ka ěngkang rek bela pati, dina waktu sakieuna, nudju tunggara nja ati.
Pangkur
- Pangeran Purnama Alam, hanteu lami saprantos guněm warti, sarěng rai hanteu kantun, sarta waktu harita, sami kulěm wantu nudju tabuh satu, gantjangna nu ditjarita, kotjapkeun isukna deui.
- Harita ěnggeus ubiag, Raden Patih djeung sakabeh pramantri, di bumi Sang Maha Wiku, geus pada dangdan-dangdan, kitu deui Pangeran Pinutra Sunu, geus nganggo di patamuan, sarěng raji Njai Dewi.
- Saparantos těras djěngkar, ti patamon ka bumina Sang Rěsi, Kania djeung putra Sunu, barang sumping ka dinja, ret katingal ku Patih djeung Maha Wiku, sarta ku santri sadaja, jen Pangeran Putra sumping.
- Sadajana rěsěp ningal, ka Pinutra sarta ka Njai Dewi, tina langkung nurub tjupu, pada sami endahna, eukeur alus kawuwuh pamurub mantjur, paměgět kaja dewata, istrina lir widadari.
- Sumawonna Arja Patya, langkung-langkung nandang kajungjun galih, sarta njaur dina kalbu, asa mohal katjida, Kangdjěng Ratu teu asiheun ningal mantu, sakitu leuwih geulisna, hese lamun njiar tanding.
- Ngan muga-muga djěng Radja, masing leuwih asih ka Njai Dewi, sarta kaběnduna lipur, da nangguh moal aja, rupa putri bangsa těrah para ratu, anu pantěs ka Purnama, djaba ti ieu Nji Dewi.
- Kitu manahna Aria, mangnědakeun ka putri Paramanik, katjaturkeun Maha Wiku, njampeurkeun ka Pinutra, ngaharewos bisi nu sedjen ngadangu, duh Agan ama ngemutan, sarěng ka ieu Nji Dewi.
