Ieu kaca geus diuji baca
14
marga ngangluh, kana galih Sang Pinutra.
- Ngahulěng henteu ngalahir, Sang Putra Purnama Alam, rupina sumiak lungse, bawaning deudeuh ka garwa, sarta těras ngandika, ja Allah kutan teh kitu, lantaran Njai pang lunta.
- Naha hěnteu njana teuing, ama Prabu kitu manah, montjor ti tědak narpatos, teu aja těmah kusumah, tata pangomah-ngomah, ngaladjur kana teu puguh, nundung ka nu tanpa dosa.
- Teu nětěpan sipat lantip, sumangka ka nu teu njata, njeeh ka marga papasten, tatapina ajeuna mah, ĕngkang moal kapalang, bumela nu moal buntu, ka diri Njai sorangan.
- Djeung moal balik ka nagri, nadjan dipapag diala, urang di pasantren bae, ngiring ama Gurangsarak, sabab engkang teu hajang, njuuh ka sěpuh kaliru, njambat ka kolot masiat.
- Barang nguping Sang Pramanik, kana saur Sang Pinutra, kasar anu henteu sae, katurug-turug katingal, sumiak paromanna, nguwungna nu langkung bĕndu, ka rama Sang Sri Nalendra.
- Sang Dewi Pramanik nangis, bari njěbat duh gamparan, naha bět panggalih nobros, kapan tadi panuhunan, abdi teh ka gamparan, samemeh abdi piundjuk, ulah dugi ka kituna.
- Ajeuna gamparan djalir, sulaja tina subaja, karantjana galih awon, aja saur rek malèsan, ku bangsa kabědangan, ngutjulkeun tuhu ka sěpuh, mukahkeun sembah ka sěpah.
- Abdi mah bět paur teuing, inggis raga teu djamuga, diemutkeun kitu komo, kirangna harkat daradjat, tjatjakan sahinasna, mikukuh tuhu ka sěpuh, bět sakieu karaosna.
- Upami gamparan tigin, galih bade kikituan, ngĕrsakeun kana teu sae, abdi sumědja sumadrah, něda ka Nu Kawasa, kana lampus pěgat umur, kaluar ti lara dunja.
- Nadjan abdi lambat ngiring, ngatjatjang di pawěnangan, ari wungkul gĕring hate, lantaran ningal gamparan, taja euih-euihna, tina nandangan pakewuh, djěmbar ku sangsara dunja.
- Tangtos djadi tjiri bukti, panjangkana anu lian, tetela jen awon rěpok, atanapi pada njangka, abdi awon wirasat, djuru nungtun kana kusut, nu purah mawa sungkawa.
- Dipikir dibulak-balik, ana kitu mah gamparan, nu bade nganiaja teh, saupami tětěrasan, běndu ku djalan eta, margi eta rebu-rebu, panuhun mugi kemutan.
- Upami jaktos miasih, ka abdi nu sakieuna, bodo tur kokoro njoso, taja anu dipuntangan, kadjabi ti gamparan, abdi hajang enggal
