15. Sae pisan nadjan hojong endjing, malah jaktos kédah enggal-enggal, wuwuh endjing dawuh sae, gantjangna nu ditjatur, saréng Sang Dewi, bubaran guném warta, sarta geus ditangtu, endjing pidjéngkareunana, Sang Pinutra Purnama Dewi Pramanik, saréng Dewi Pursita.
16. Anu ngiring Manetja Manetji, senapati ibaris djaga bahja, katjatur isukna bae, dikira bada subuh, Radjaputra djeung para putri, harita geus sadia, geus amit ka Wiku, Sang Rési téras ngandika, didungakeun ku ama pamugi-mugi, djémbar kawiludjéngan.
17. Nitis tulis geusaning pérjogi, handjat sipat daradjat hidajat, tumete kadjaten tulen, kasinungan rahaju, tigin ngantjik dina walagri, mulja dunja aherat, ama teh sakitu, pandu‘a ka sadajana, hanteu lami sadaja sudjud ka Rési, ngalap kamaunatan.
18. Gantjangna teh ieu nu digurit, teras djéngkar praputri Sang Putra, tabuh génép rébun keneh, mudun ti luhur gunung, djalan mapaj pasir, njorang kana bubulak, nudju leuweung liwung, tapi taja karepotan, wantu-wantu didjaring ku eusi galih, mangpa‘at pangawasan.
19. Asal leuweung poek sakuriling, djadi tjaang gumilang lajungan, bodjong-bodjong djadi objor, hunjur-hunjur ngagébur, keusik-keusik pating karétip, tjadas-tjadas harerang, mun batu malantjur, lembang djeung lamping gumilang, kasorotan ku tjahja Putra djeung Putri, sakur anu kasorang.
20. Siang-wéngi angkat ‘hanteu ngantjik, taja pajah taja karipuhan, teu leuleus lésu teu lungse, angkat titih dibarung, itung-itung damél pélésir, angkat ajang-ajangan, Pramanik Sang Sunu, Pursita pungkureunana, saheulaeun Endang Manetja Manetii, ngahélar di tétélar.
21. Tunda heula Sang Putra praputri, katjaturkeun Arja Langlangturna, djeung Turni masih ngarébon, waktu harita nudju, sami tjalik di tépas bumi, méntas ti padamélan, ngaseuk djagong sékul, hanteu lami Langlangturna, seug ngalahir ka garwa kakang ti peuting, menéran bidjil padjar.
22. Ngimpi tépang saréngan Sang Adji, Sang Srimaha Ratu Langlangsona, ka kakang njandak tjarios, saurna nu kaemut, Patih geuwat geura sajagi, beberes patempatan, bakal aja tamu, kudu dipusti dihormat, sabab anu bakal ngadjait prihatin, ngahandjatkeun ti bahja.
23. Ngan sakitu saurna nu sidik, tina sabab kaburu ngaleénjap, njaring katedjeh ku maneh, ku sabab eta kitu, poma pisan kudu tjaringtjing, bisina bae énja, bakal aja tamu, ajeuna saaja-aja, djidjieunan ngadodo agangleng ngawadijit, gégéplak pujur opak.
