Ieu kaca geus divalidasi
Asmarandana
- Katjatur Dewi Pramanik, leuwih-leuwih nandang samar,samar polah samar raos, tina hojong enggal njata, saha anu wawarta, sarěng rama Maha Wiku, dina djěro padjuaran.
- Lami-lami tambah sidik, kana gěntra Sang Pinutra, karungu bati nongtoreng, gumentjrang nu leuwih terang, Pramanik sakalintang, galih rumendjag rumandjug, dugi ilang kapahingan.
- Teu lami gerendel muih, ngarěket panto rek muka, atuh Sang Dewi teu pĕtot, kana panto lawang kamar, mapagkeun ku paningal, dibarung djeung mendung kalbu, barang braj pantona muka.
- Barabaj tjahja guměling, awor djeung anu di luar, sorotna patodjo-todjo, bati gumilang guměbjar, ngagebur lir lajungan, Sang Putra gabrug ngarangkul, mangkon djeung bari sasambat.
- Duh aduh bět ieu geuning, mustika djungdjunan ĕngkang, sekar rungrumaning hate, naha ěnung teh bět tega, engkang nandangan bahja, hěnteu njusul ku paněmu, teu bela ku pangawasa.
- Barang Sang Dewi Pramanik, dirangkul ku Radjaputra, lat ilang galih nu saleh, sipat mawat kadjatian, bawaning kasěsěkan, ku ngandung kaliwung kalbu, lěpat tata kapahingan.
- Ngotjeak ngadjĕrit tarik, nangis dibarung sasambat, njuuh ka pangkon Sang Anom, duh-aduh Gusti panutan, gunggunganing pangrasa, sasaka pamurub napsu, rungrumeun raga djeung njawa.
- Naha bět pulih panggalih, henteu langgeng kalenggangan, gampil morosot kaabot, ka abdi nu kieu sipat, nu taja sarat harkat, dumugi gamparan wantun, ngantun teu aja rasrasan.
- Naon anu djadi margi, gamparan ka abdi tega, luas lolos teu tjarios, atuh abdi nadah bahja, kenging sungkawa nista, ngadjadi djuru kaliru, manusa pangeusi alas.
- Kairid ku wangsit nagri, dipědar diembar-embar, djadi běběndon karaton, dumugi kalunta-lunta, njorang raga pĕrlaja, ampir nudju kana lampus, meh pědjah pangodjah njawa.
- Gamparan nu djadi awit, ngěnjang kana marga lara, njembor ku geusan prihatos, disěbat kana galagat, mawat awon wirasat, ditutur panungtun kusut, watěk panarik tjilaka.
- Abdi teh njingkir diusir, ngědjat sanes djalan minggat,
